Ég verð að deila með ykkur uppskrift að svo dásamlega góðri tertu. Ég fór með hana í stórt fjölskylduboð um daginn og þar var fólk hreinlega að missa sig yfir þessar tertu. Ég er að baka hana aftur núna í kvöld og ætla að fara með hana á kökuhlaðborð í skóla barnanna á morgun. Ég er meira að segja að hugsa um að baka hana aftur fyrir aðventuboð á sunnudaginn. Ég náði nefnilega bara að smakka örlítinn bita af þessari ljúffengu tertu í boðinu um daginn og er búin að dreyma um að baka hana aftur við fyrsta tækifæri. Ég held að ég geti fullyrt að þessi tertuuppskrift sé alveg skotheld! :) 
Uppskrift:
- 4 eggjahvítur (lítil egg)
- 3 dl sykur
- 1 tsk vanillusykur
- 1 tsk lyftiduft
- 160 g Ültje salthnetur
- 80 g Ritz kex
Dumle krem:
- 60 g smjör
- 1 poki dökkt Dumle (110 g) eða orginal
- 4 eggjarauður
Ofan á kökuna:
- 3 dl rjómi
- 40 g Ültje salthnetur, saxaðar gróft
- nokkrir Dumle molar, skornir eða klipptir í þrennt.
Ofn hitaður í 180 gráður við undir- og yfirhita. Eggjahvítur stífþeyttar og sykrinum bætt út í smátt og smátt. Salthnetur og Ritzkex mulið smátt í matvinnsluvél og bætt út í marengsinn með sleikju ásamt vanillusykri og lyftidufti. Deiginu er hellt í 24 cm smellu- eða silíkonform. Bakað í ofni við 180 gráður í um það bil 25-30 mínútur.
Smjör er sett í pott og brætt við meðalháan hita. Dumle molum er bætt út í og allt látið bráðna, kælt lítillega. Eggjarauður eru þeyttar ljósar og léttar og bræddu Dumleblöndunni bætt út í. Kakan er sett á kökudisk og Dumlekreminu dreift yfir kökuna. Að lokum er rjóminn þeyttur og honum dreift yfir kökuna. Skreytt með gróft söxuðum salthnetum og niðurskornum Dumle karamellum. 
Filed under: Eftirréttir, Kökur, Tertur Tagged: dumle uppskriftir, kaka með ritz kexi, kaka með salthnetum, marengsterta með karamellukremi, Marengsterta með salthnetum og ritz kexi, terta með dumle karamellukremi, terta með karamellukremi
